У суботні дзень 10 красавіка ў рамках рэспубліканскага праекта “Сустрэчы на ўсе 100!” піянеры дружыны сустрэліся з загадчыкам Падсвільскай занальнай бібліятэкі Яцкоўскай Святланай Паўлаўнай. Яна запрасіла вучняў на выставу “Гуканне Вясны” і расказала аб тым, што ў беларускай традыцыі ёсць такое абрадавае свята. Гэта дні, калі ўжо бачна, што зіма адступае. Каб Вясна прыйшла хутчэй, яе трэба гукаць. У абрадзе галоўнае – весяліцца, спяваць ды радавацца жыццю. Людзі гавораць, што вясну прыносяць птушкі, таму яна паказала птушачак, якіх зрабілі з паперы, саломкі, цеста, тканіны. Яна паведаміла аб тым, што Глыбоцкі раён выбраў птушку-сімвал – ёй стаў прыгажун-шпак. Ён мае вельмі шырокі дыяпазон гукаў і здольны імітаваць не толькі галасы самых розных птушак, але і іншых жывёл і нават немеладычныя шумы. Але найперш шпака выбралі за яго любоў да… вішні. Дзеці паглядзелі прызентацыю, паслухалі песню пра гэту птушку, паўдзельнічалі ў карагодзе.