Дзень роднай мовы асаблівы для кожнай нацыі, кожнага народа, бо няма народа без мовы, няма мовы без яго носьбіта. 21 лютага ЮНЕСКА абвясціла Міжнародным днём роднай мовы, каб папярэдзіць знікненне асобных гаворак свету і захаваць моўную разнастайнасць.

Ярка і запамінальна прайшоў у нашай установе адукацыі Дзень роднай мовы. Настаўніца беларускай мовы і літаратуры Пасюк Т.І., музычны кіраўнік Карашкова Т.Ф., вучні 7а класа падрыхтавалі для вучняў літаратурна-музычную кампазіцыю “Роднай мовы пералівы”. Удзельнікіз гонарам расказвалі аб тым, што ім у спадчыну засталася ўнікальная мова – жывая і мілагучная, песенная і паэтычная, мова бацькоў і дзядоў, вялікі нацыянальны скарб.  Гледачы слухалі вершы і песні на роднай мове, гранне на скрыпцы і флейце (у госці былі запрошаны настаўнікі Падсвільскай музычнай школы), нікога не пакінуў абыякавым танец дзяўчат пад песню “Слуцкія ткачыхі”.

Дырэктар установы адукацыі Сауліч Л.І. выказала вучням пажаданне размаўляць на роднай мове не толькі падчас правядзення мерапрыемстваў у школе і з гонарам усведамляць, што ўсе мы – дзеці самай лепшай краіны на свеце – Беларусі!

Смак роднай мовы не павінен забывацца. Калі ты нарадзіўся беларусам, калі ты жывеш на зямлі Беларусі, нельга не шанаваць родную мову, менавіта яна злучае людзей у адзін народ – такая галоўная тэма мерапрыемства, прысвечанага роднай мове.